اخيراااااااااااااااااا وجدتها ... اصلي تعبت اوي علي ما لقيت حاجة اتكلم عنها تبدأ بحرف الــ "ث" استكمالا لتحدى الكتابة بتسلسل الحروف الابجدية العربية دفعتي العريقة العظيمة بيحاولو يعملو اضراب .. عن ايه ؟؟
عن الامتحانات .. ليه ؟؟ عشان يضغطو علي "معرفش عاوزين يضغطو علي مين الصراحة :D " بس هم يعني عاملينه عشان الناس زمايلنا اللي كانو ف المستشفي الميداني في رمسيس و اتقبض عليهم ضمن من قبض عليهم يوم اقتحام قوات الأمن لمسجد الفتح .. مع اخرين اتقبض عليهم ف أماكن متفرقة
دفعتي العريقة العظيمة هي الدفعة اللي حاليا هي الفرقة السادسة بكلية طب جامعة عين شمس
الدفعة اللي عمرها ما وقفت ايد واحدة الا في بوستات العزاء علي جروب الدفعة
الدفعة الي كل واحد فيها لو خيرته بين حاجة هتفيده لوحده و حاجة هتفيد الجميع هيختار اللي يفيده لوحده
"إلا من رحم ربي" طبعاً
الدفعة دي قررو يبقو رجالة لاول مرة في حياتهم و يقفو جنب زمايلهم المعتقلين علي ذمة قضايا
كل واحد و ليه اسبابه بقي
واحد صاحب قضية عنده استعداد يموت عشانها .. الواحد دا مش فارق معاه هيضرب عن الامتحان لوحده و لا في وسط ناس كتير
واحد تاني حاسس بالظلم و نفسه يعمل حاجة يساعد بيها زمايله ف محنتهم مع ان القضية مش قضيته اصلا بس زيه زي اول واحد مش فارق معاه غير انه يعمل اللي شايفه صح و بس
في بقي ناس تانية ظريفة اوي
الناس دي متعرفش بقي مكسوفين يقولو احنا مش هنعمل اضراب او هايصين ف الهيصة و ساعة الجد هيقلبو فراخ بلدي او تحس انهم عاوزين يعملو حاجة فعلا بس ميتضروش و دول بقي اول ما الامتحان يقرب هيجرو جري عاللجنة يمتحنو
الناس التانية دي ماشيين يروجو للاضراب كانهم هم المحبوسين .. كل واحد فيهم عمال يشتم من تحت لتحت ف الناس اللي مش عاوزة تعمل اضراب و دا طبعا عشان من جواه مرعوب ليعملوها و يمتحنو فعلا فيبقي مفيش قدامه غير انه يظهر علي حقيقته و يروح يمتحن او يداري حقيقته او يسترجل و ميمتحنش و ساعتها هيموت بحسرته
هم مؤمنين ان الاضراب دا حرية شخصية بس انت لازم تشارك فيه بس انت حر بردو بس لو مشاركتش هتبقي وحش و ندل و مش راجل و عيل في نظر البعض و خاين و كافر و منافق و عميل في نظر البعض الاخر و عبد للدجات في نظر البقية
اللي اعرفه ان اللي عنده مبدأ و قضية و قرر يقف و يقول لأ .. المفروض ميفكرش طب انا هيصيبني ضرر و لا لأ و الضرر هيبقي ايه ؟؟
يا تبقي راجل بجد .. يا تفضل عيل زي مانت .. انما انك تبقي راجل علي ما تفرج دي مفهمهاش
انا لحد دلوقتي مش عارفة هشارك في الاضراب و لا لأ
فيه 300 الف رأي و رأي في دماغي من جوه
بس الأكيد اني لما هاخد قرار هبقي علي قدر المسؤولية الكافي لتحمل تبعات هذا القرار ايا كانت .. مش هبقي عيلة توتو زي ناس :D
