تخاريف الامتحانات

تاء: استكمالا تحدي الكتابة بترتيب الحروف الابجدية النهاره هتكلم عن تخاريف الامتحانات

كلها كام يوم و امتحن "غالبا يعني :D " امتحانات اعمال السنة  ترم تاني سنة ساتة طب "نسا و جراحة"
كعادتي يعني مع الامتحان القلق بيتزايد كل يوم عن التاني افكاري كلها بترتبك و كل ما الامتحان يقربب اكتر كل ما حلتي تسوء اكتر
لحد ما اوصل لمرحلة التخاريف :D

بنسي اسامي الحاجات اللي حواليا و ساعات اسامي الناس كمان
مثلا: البتاع اللي كان هنا دا اللي كنت بكتب بيه مش عارفة راح فين و اقعد افتكر كان اسمه ايه لحد ما حد يفكرني اني بدور علي قلمي :D
مش كده و بس .. لا الموضوع ممكن يزيد لدرجة ان سلوك المخ تضرب ف بعض فأسمي الحاجات بأسامي غير اساميها
يعني التليفزيون يبقي غسالة و الشاي يبقي بيتاكل :D


تيجي بقي مرحلة الكوابيس .. كوابيس ثابتة مبتتغيرش
كابوس 1 : اروح الكلية متاخر يكون الامتحان خلص فممتحنش
"ملحوظة: عملتها فعليا في امتحان الكيمياء الحيوية في سنة اولي طب"
كابوس 2 : اروح الكلية ف معادي و اول ما استلم الورقة اكتشف اني ذاكرت مادة و الامتحان طلع ف مادة تانية خالص
"ملحوظة: اناعملتها فعليا و انا في تانية اعدادي كنت فاكرة اني همتحن علوم و رحت الامتحان لقيته امتحان رياضة"

و يكتمل الابداع بقي و انا ف لجنة الامتحان
 السؤال اللي اجابته D اغلط و بدل ما اعلم علي خانة D اعلم الاجابة في خانة C
و هكذا ف باقي الحروف بردو 
بكتشف بلاوي في اجاباتي و انا براجع .. المشكلة ان غالبا الامتحان وقته مبيكفيش اني اراجع

الحمد لله كلها كام شهر و اتخرج و ارتاح من هم الامتحانات مؤقتا "سنتين كده مثلا" علي ما ييجي وقت تقديم الماجيستير
يمكن اكون اتعالجت ساعتها :D